Պատիվ եմ ունեցել մասնակցելու Հայկական Կարմիր խաչի ընկերության կողմից իրականացված առաջին օգնության տեսական և գործնական դասընթացներին, որը համապատասխանում է Կարմիր Խաչի և Կարմիր Մահիկի Առաջին օգնության Եվրոպական չափանիշներին։ Մինչ դասընթացին մասնակցելը սիրողաբար էի մոտենում առաջին օգնությանը և միայն մասնակցությունից հետո հասկացա, որ ճգնաժամային և արտակարգ իրավիճակներում ինձանից կարող են կյանքեր կախված լինել։ Այդ զգացողությունն ավելի ամրապնդվեց, երբ դասընթացի մասնակցությունից շուրջ մեկ տարի անց հայտնվեցի ավտովթարի էպիկենտրոնում և կարողացա արդյունավետ առաջին օգնություն ցուցաբերել ծայրահեղ ծանր վիճակում գտնվող կնոջը, մինչ շտապ օգնությունը կհասներ (40 րոպե)։

Այս ամենը չէի կարողանա անել, եթե դասընթացի ընթացքում չուսումնասիրեինք նաև արտակարգ և հոգեբանական լարված իրավիճակներում հուզական հաղորդակցության մեջ մտնելու առանձնահատկությունները տուժածի և շրջապատում գտնվող քաոսային գործողություններ անող հասարակության հետ։

Անչափ շնորհակալ եմ ընձեռված հնարավորության համար, որովհետև ԱՕ գիտելիքներն ու հմտություններն իրապես ուղղված են կյանքեր փրկելուն։

Հայկական Կարմիր խաչի ընկերությունը դասընթացներ էր կազմակարպել Տավուշի մարզի 12 սահմանամերձ գյուղերի քաղպաշտպանության թիմերի անդամների համար: Դասընթացներն անցնում էին կարծես մի շնչով, տղաներն ակտիվ մասնակցում էին տեսական և գործնական պարապմունքներին: Բավական մեծ արդյունքներ կան, ու պատահական չի, որ բոլորովին վերջերս ստորաբաժանումներից մեկում իմ տղաները օգնեցին ազդրի բաց կոտրվածքի ժամանակ անշարժացման համար,և  հիվանդանոցում անգամ բժիշկներն էին զարմացել, որ մասնագիտորեն ճիշտ  կարողացել էին առաջին օգնություն  կազմակերպել: Դա այս դասընթացների շնորհիվ է: 

Շնորհակալություն ՀԿԽԸ ԱՕ թիմին: 

Ինձ համար մեծ պատիվ էր մասնակիցը լինելու Հայկական Կարմիր խաչի ընկերության կողմից անցկացվող դասընթացին (կազմակերպված ՀԿԽԸ ու ՀՀում ՄԱԿ-ի ներկայացուցչության կողմից)։ Դասընթացն ինտերակտիվ է ու տալիս է ոչ միայն մատչելի գիտելիքներ, այլ համեմված է գործնական աշխատանքներով, որոնք մասնակցին հնարավորություն են ընձեռնում իրենց շրջապատում լինել այն մեկը, ով կարող է կյանք փրկողը լինել։ Այդ դասընթացը հետաքրքիր, ուսանելի ու խիստ օգտակար է։ Ով էլ որ լինես՝ տնային տնտեսուհի, մանկապարտեզի դայակ, շինարար, վարորդ, դիվանագետ կամ նախարար մարդուն փրկելու հմտությունը մի օր շատ պետք է գալու։

Տասը տարի աշխատելով լրագրության ոլորտում եւ լուսաբանելով առողջապահության ոլորտը, բազմիցս առիթ եմ ունեցել տարբեր թեմաներով տեսանյութեր պատրաստել նաեւ Հայկական կարմիր խաչի ընկերության հետ։ Տեսանյութերի պատրաստման ընթացքում, ակամայից, ես էլ եմ բազմաթիվ գիտելիքներ ձեռք բերել կարմիր խաչի անձնակազմից`առաջին օգնություն ցույց տալու կանոնների մասին, որոնք առօրյայում մշտապես կարող են պետք գալ։ Օրինակ` մի անգամ, դրսում մի աղջիկ էր ուշագնաց եղել, բոլորը փորձում էին լեզուն բռնել, որ կուլ չգնա, մեկը իր սրտի դեղերն էր փորձում խեղճի բերանը մտցնել, իսկ ես անմիջապես հիշեցի կարմիր խաչում բազմիցս լսած խոսքերը, որ լեզուն երբեք կուլ չի գնում, ընդհամենը բոլոր մկանների նման թուլանում է եւ ուշագնաց եղած մարդու շնչուղին բացելու համար, պետք է ուղղակի գլուխը հետ տանել, երբեք չփորձել բերանը որեւէ անհայտ ծագման դեղ մտցնել։ Այդպես էլ արեցի, հետո կանչելով, ուսին թեթեւ հարվածելով , դեմքին թեթեւ ջուր ցողելով, փորձեցի ուշքի բերել։ Բարեբախտաբար ամեն բան լավ անցավ։ Իսկ ես էլ ավելի համոզվեցի, որ պետք է շարունակել համագործակցությունը արդեն հարազատ դարձած Հայկական կարմիր խաչի ընկերության հետ եւ մարդկանց շարունակել կրթել տեսանյութերի միջոցով եւ ինչու ոչ նաեւ ինքնակրթվել։

Պատերազմող երկրում առաջին օգնության ցուցաբերման դերը դժվար է թերագնահատել։ Շնորհակալություն Հայկական Կարմիր խաչի ընկերության Առաջին օգնության հրահանգիչներին՝ յուրահատուկ և արդյունավետ դասընթացների համար։